İdman

gimnastikadan

başlayır

Azərbaycan Gimnastika Federasiyasının yenidən qurulmasının 20 illiyinə həsr olunmuş birgə yarışlar

Azərbaycan Gimnastika Federasiyasının yenidən qurulmasının 20 illiyinə həsr olunmuş birgə yarışlar

Yarış haqqında

Dekabrın 8-dən 11-dək Şəki Olimpiya İdman Kompleksində Azərbaycan Gimnastika Federasiyasının yenidən qurulmasının 20 illiyinə həsr olunmuş gimnastikanın 6 növü üzrə birgə yarışlar təşkil ediləcək.
Qədim tarixə və mədəniyyətə malik Şəki şəhərində keçiriləcək birgə yarışlar çərçivəsində idman gimnastikası və akrobatika gimnastikası üzrə 27-ci, qadın idman gimnastikası, batut gimnastikası və aerobika gimnastikası üzrə 6-cı, tamblinq üzrə 18-ci Azərbaycan çempionatı və bədii gimnastika üzrə 27-ci Azərbaycan birinciliyi baş tutacaq.  
Qeyd edək ki, indiyədək ölkəmizin müxtəlif bölgələrində gimnastika növləri üzrə yarışları təşkil edən Azərbaycan Gimnastika Federasiyası ötən illərdən fərqli olaraq birgə yarışları ilk dəfə paytaxt Bakıda deyil, məhz bölgədə təşkil edəcək.  
Dekabrın 9-da, yarışların açılış mərasimi zamanı tamaşaçılara dünya şöhrətli gimnastika ulduzlarının ifasında qala-şou təqdim olunacaq. İdmançılar təqdim edəcəkləri maraqlı nümunəvi çıxışları ilə azarkeşlərə öz ustalıqlarını nümayiş etdirəcəklər. Bu münasibətlə ölkəmizə təşrif buyuracaq idmançılar arasında qadın idman gimnastikası üzrə Böyük Britaniya yığmasını təmsil edən əslən azərbaycanlı Cessika (ikiqat Avropa çempionu, dünya çempionatının qızıl və ikiqat bürünc mükafatçısı, Tokio Olimpiya Oyunlarının komanda hesabında bürünc mükafatçısı) və Cenifer Qədirova (Tokio Olimpiya Oyunlarının komanda hesabında bürünc mükafatçısı, Avropa çempionatının komanda hesabında gümüş mükafatçısı) bacıları, kişi idman gimnastikası üzrə Tokio Olimpiya Oyunlarının bürünc mükafatçısı, ikiqat Avropa çempionu, türkiyəli Ferhat Arıcan, bədii gimnastika üzrə italiyalı dünya çempionu, Avropa çempionatının gümüş mükafatçısı Milena Baldassarri, akrobatika gimnastikası üzrə İsrailin kişi qrupunun üzvləri Amir Daus, Tomer Offir (dünya çempionatının bürünc mükafatçıları), Or Abraham (gənclər arasında Avropa çempionu), Rotem Amihai və dünya yaş qrupları yarışının qalibləri Yonatan Fridman və Amy Refaelidən ibarət qarışıq cütlük yer alıb.   
İnanırıq ki, məhz tanınmış idmançıların iştirakı ilə keçiriləcək yubiley yarışı Şəki tamaşaçılarına unudulmaz anlar bəxş edəcək. 

Yarışlara giriş sərbəstdir.
Məkan: Şəki Olimpiya İdman Kompleksi
Ünvan: Şəki şəh., S.Mümtaz küç., 1
 

Faydalı məlumatlar

İştirakçılar

Nəticələr