Azərbaycan Gimnastika Federasiyasının mətbuat xidməti  Monqolustanın “Monray” klubunun qadın idman  gimnastikası üzrə məşqçisi Burenbatar Munksaykan ilə müsahibəni təqdim edir.
- Azərbaycana xoş gəlmisiniz. Zəhmət olmasa, səfəriniz barədə məlumat verərdiniz.
- Biz buraya bir ay yarım ərzində məşq etmək, eyni zamanda beynəlxalq səviyyəli yarışlara hazırlıq məqsədilə gəlmişik. Komandamız 18 idmançıdan ibarətdir. Onlardan 3-ü qadın, qalanları isə kişidir. Kişilərdən ibarət yığma komandamızın üzvləri də burada keçirilən məşqlərdə iştirak edirlər.
- Gimnastlarınız barədə bir qədər məlumat verərdiniz.
- Gimnastlarımızın əksəriyyəti kiçikyaşlıdırlar. Onların təxminən 9-10 yaşı var. Burada kiçiklər üçün nəzərdə tutulan alətlərdə etdiyimiz təməl məşqləri gələcəkdə mürəkkəb elementlərin öyrənilməsinə xidmət edir. Çünki Monqolustanda balaca gimnastlar üçün çox az sayda alət mövcuddur.
- Ölkənizdə gimnastika necə inkişaf edir?
- Fikrimcə, inkişaf prosesi indi başlayır. Təxmin edə bilərəm ki, bu proses növbəti 10-20 il ərzində davam edəcək. Hələ ki, istədiyimiz inkişaf tempinə nail ola bilməmişik.
- Azərbaycana ilk dəfə səfər edirsiniz?
- Xeyr. Keçən il burada olmuşam. Burada kişi və qadın gimnastlarımız ilə birlikdə Asiya çempionatına hazırlaşırdıq.
- Burada hansı yarışlara hazırlaşırsınız?
- Kiçik gimnastlar beynəlxalq yarışlara, böyükyaşlı idmançılarımız isə gələn il keçiriləcək Dünya kubokuna hazırlaşırlar. Burada məşq etmək və yaşamaq üçün hər cür şərait mövcuddur. Təlim-məşq üçün hər bir şərait var. Azərbaycanda  gimnastikanın bütün növləri inkişaf edir. Təbii ki, bu şərait müqayisə oluna bilməz.