Avropa Çempionatında öz gimnastlarını dəstəkləmək üçün Bakıya gələn Rusiyalı gimnastların azarkeşlərdən ibarət dəstək qrupu yarışların təşkilindən razı qalıblar.

“Hər şey yaxşıdır, çempionat da gözəl təşkil olunub” – bu sözləri bazar günü dəstək qrupunun üzvü Mariya Titova “Trend” saytına bildirib.

Bundan əlavə o, yarışın keçirildiyi Milli Gimnastika Arenasının möhtəşəmliyini xüsusi vurğuladı.

“Biz tez-tez müxtəlif çempionatlarda iştirak etmişik, xüsusilə ötən il və ondan öncəki illərdə Dünya və Avropa çempionatlarında olmuşuq. Biz dəstək qrupundayıq, bizi yarışlara qızlarımıza dəstək olmaq üçün dəvət edirlər” – Titova qeyd edib.

O, Bakıda keçirilən Avropa Çempionatının bütün iştirakçılarına uğurlar arzuladı. “Qoy güclü qalib gəlsin” – deyə, dəstək qrupunun üzvü əlavə etdi.

13 iyun tarixində Bakıda Milli Gimnastika Arenasında bədii gimnastika üzrə sayca 30-cu yubiley Avropa Çempionatı start götürüb. Bakıda artıq 3-cü dəfədir ki, keçirilən yarışda 33 ölkədən 258 gimnast iştirak edir.Onlar 9 cüt medal uğrunda mübarizə aparırlar.