Azərbaycan Gimnastika Federasiyasının mətbuat xidməti Monqolustan Gimnastika Federasiyasının Xarici əlaqələr şöbəsinin komanda meneceri Nadejda Safronova ilə müsahibəni təqdim edir.
- Təlim-məşqlərə neçə idmançı cəlb olunub?
- Məşqlərdə bədii gimnastikada üzrə 4 qadın idmançı iştirak edir. Onlardan 2-si böyük, 2-si isə yeniyetmə idmançıdır. İdman gimnastikası üzrə isə 2 qadın və 3 kişi idmançı məşqlərə cəlb olunub.
- Monqolustanda hansı gimnastika növləri daha çox inkişaf edib?
- Monqolustanda bədii gimnastika, idman gimnastikası və aerobika gimnastikası mövcuddur. Federasiyamızın məşqçiləri gimnastikanın ölkəmizdə geniş yayılması üçün əllərindən gələni əsirgəmirlər.
- Bildiyimizə görə, ilk dəfədir ki, ölkəmizin qonağı olursunuz. Azərbaycan, burada yaradılan şərait barədə təəssüratlarınızı bizimlə bölüşərdiniz.
- Bəli, bu, bizim Bakıya ilk səfərimizdir. Milli Gimnastika Arenasında yaradılan şərait və imkanlar bizdə xoş təəssüratlar yaratdı. Biz həmçinin Azərbaycan Gimnastika Federasiyasının rəhbərliyinə, AGF-nin İcra Komitəsinin üzvü Mariana Vasilevaya, idman direktoru Natalya Bulanovaya, baş katib Nurlana Məmmədzadəyə və federasiyanın bütün əməkdaşlarına dərin minnətdarlığımızı bildiririk.