25-30 oktyabr tarixlərində Bəhreyn Krallığının Manama şəhərində keçirilən “Bəhreyn-2024 Gimnaziada İdman Oyunları” beynəlxalq yarışı başa çatıb.

Milli komandamızın üzvləri bu yarışda ölkəmizi aerobika gimnastikası, bədii gimnastika və qadın idman gimnastikası kateqoriyaları üzrə təmsil ediblər.

Belə ki, aerobika gimnastikası üzrə fərdi proqramda Məryəm Topçubaşova 18.550 xal qazanaraq bürünc medalla 3-cü yerdə, qrup hərəkətləri proqramında isə gimnastlarımız 18.300 xal qazanaraq gümüş medalla 2-ci yerdə yarışı başa vurdular.

Yarışda bədii gimnastika üzrə iştirak edən millimizin üzvləri Şəms Ağahüseynova və Sofiya Məmmədova çoxnövçülük üzrə yüksək nəticə göstərərək 2-ci və 3-cü yerin sahibi oldular. Şəms Ağahüseynova 111.850 xalla gümüş medal, Sofiya Məmmədova isə 110.600 xalla bürünc medal qazandı.

Fərdi proqramda isə Sofiya Məmmədova halqa ilə 1-ci (29.450 xal), topla 2-ci yerə (28.050 xal), Şəms Ağahüseynova lentlə 2-ci (27.350 xal), halqa ilə 3-cü yerə (29.000 xal) layiq görüldü.

Qızlarımızı bu nailiyyətlər münasibətilə təbrik edir və növbəti yarışlarda uğurlar arzulayırıq!