Azərbaycan Gimnastika Federasiyası 2024-cü ilin yekunlarına əsasən ilin ən yaxşı gimnastlarının adlarını açıqlayıb.
Sıralamanın ilk pilləsində “Paris-2024 Yay Olimpiya Oyunları”nın finalçıları qrup hərəkətləri komandası - Güllü Ağalarzadə, Ləman Əlimuradova, Kamilla Əliyeva, Zeynəb Hümmətova, Yelizaveta Luzan, Darya Sorokina yer alıb. 
İkinci yerdə ikiqat Dünya çempionu, Dünya çempionatının bürünc medalçıları və Dünya Kuboku seriyasının qalibləri, akrobatika gimnastikası üzrə qarışıq cütlüyümüz Ağasif Rəhimov və Raziyə Seyidli qərarlaşıb. 
3-cü pillədə Avropa çempionatının gümüş medalçısı, kişi idman gimnastımız Nikita Simonovdur. 
Avropa çempionatının komanda hesabında bürünc medalçıları Şəms Ağahüseynova, Fidan Qurbanlı, İlahə Bahadirova və Gövhər İbrahimova 4-cü pillənin sahibi olublar.
Dünya çempionatının ikiqat bürünc, Avropa çempionatının üçqat qızıl medalçıları, akrobatika gimnastikası üzrə kişi cütlüyümüz Daniel Abbasov və Murad Rəfiyev 5-ci olub.
“Paris- 2024 Yay Olimpiya Oyunları”nın iştirakçısı, batut gimnastikası üzrə təmsilçimiz Selcan Mahsudova 6-cı pillədə qərarlaşıb.
Dünya çempionatının gümüş medalçıları, aerobika gimnastikası üzrə qarışıq cütlük Mədinə Mustafayeva və Vladimir Dolmatov 7-ci yerə sahib olub.
8-ci pillədə Dünya çempionatının bürünc medalçıları, akrobatika gimnastikası üzrə kişi qrupu - Riad Səfərov, Abdulla Əl-Məşayxi, Rəsul Seyidli, Seymur Cəfərov yer alıb.
Tamblinqçilərimiz, Avropa çempionatının qızıl medalçıları Mixail Malkin, Tofiq Əliyev, Adil Hacızadə, Bilal Qurbanov 9-cu pillənin sahibi olub.
Qadın idman gimnastımız Nazənin Teymurova reytinq sıralamasında 10-cudur.

Gimnastlarımızı əldə etdikləri nailiyyətlərə görə təbrik edir, 2025-ci ildəki fəaliyyətlərində uğurlar arzu edirik.