AGF-nin Texniki Direktoru Natalya Bulanova Beynəlxalq Gimnastika Federasiyasının (FIG) bədii gimnastika üzrə Texniki Komitəsinin üzvü seçilib.

Azərbaycanın gimnastika tarixində ilk dəfə olaraq ölkə təmsilçimiz FIG-nin sözügedən komitəsinə üzv seçilir.

Texniki Komitəyə seçkilər FIG-in Türkiyənin Antalya şəhərində təşkil edilmiş 83-cü Konqresi (5-7 noyabr) çərçivəsində baş tutub.

Qeyd edək ki, N. Bulanova 1980-1998-ci illərdə bədii gimnast olmuş, daha sonra isə məşqçilik fəaliyyətinə başlamışdır. O, 2002-ci ildən etibarən milli səviyyədə, 2003-cü ildən isə beynəlxalq dərəcəli hakim kimi fəaliyyət göstərir.

N. Bulanova 2014-cü ildən etibarən Bakıda keçirilən gimnastika növləri üzrə irimiqyaslı yarışlarda Yerli Təşkilat Komitəsi tərkibində Yarışların Direktoru vəzifəsini yerinə yetirir.

Azərbaycanın gimnastika ictimaiyyətini bu nailiyyət münasibətilə təbrik edir və N. Bulanovaya gələcək fəaliyyətində uğurlar arzu edirik!