Dünən, Milli Gimnastika Arenasında Batut Gimnastikası və Tamblinq üzrə Dünya Kubokunun (16-17 fevral) ilk yoxlama-məşqi keçirilib.

Yoxlama məşqi bütün yarış formatını əhatələyərək, ilk olaraq açılış mərasimindən başlayıb. Daha sonra isə Azərbaycan təmsilçiləri ilə yanaşı Polşa, Qazaxıstan və Gürcüstan komandalarının gimnastları öz proqramlarını təqdim ediblər.

Daha öncə qeyd edildiyi kimi, bu kubokun Tokio Olimpiya Oyunlarına lisenziya xarakteri daşıması gimnastların həyəcan və məsuliyyətini iki qat artırır. Elə ona görə də kuboka qədər tam formada olmaq məqsədilə, artıq bir çox ölkələrin idmançıları arenadakı təlim-məşqlərinə start veriblər.

Bir neçə gün sonra başlayacaq yarışlarda ümumilikdə 30 ölkə iştirak edəcək. Qeyd etməyə dəyər ki, ötən il Sankt-Peterburqda (Rusiya) baş tutmuş batut gimnastikası üzrə Dünya Çempionatında 33 ölkənin təmsilçiləri mübarizə aparmışdı. Ölkələrin və titullu gimnastların sayı isə öz növbəsində rəqabətin və kubokun statusunun yüksək olacağını artıq müəyyənləşdirir.

Odur ki, mövsümün ilk beynəlxalq gimnastika yarışında gimnastlarımızı dəstəkləməyə tələsin!