Bu gün Bakıda idman gimnastikası üzrə Dünya Kuboku yarışına start verilib.

Turnir Milli Gimnastika Arenasında keçirilir.

Birinci gün kişilər arasında xalça üzərində sərbəst, paralel qollarda və halqalarla hərəkətlər üzrə təsnifat yarışları olacaq. Qadınlar isə dayaqla tullanma və müxtəlif hündürlüklü qollar üzrə hərəkətlərdə finala yüksəlmək uğrunda mübarizə aparacaqlar.

Ölkəmizi kişi idman gimnastikası üzrə yarışlarda Murad Ağarzayev, Bense Talas, qadın idman gimnastlarının turnirində isə Yuliya İnşina, Marina Nekrasova, Mariya Smirnova və Yekaterina Tişkova təmsil edəcəklər.

Qeyd edək ki, Bakıda Milli Gimnastika Arenasında kişi və qadın idman gimnastikası üzrə FIG Dünya Kuboku mərhələsi martın 19-dək davam edəcək. Artıq ikinci ildir ki, paytaxtımızın ev sahibliyi etdiyi bu turnirdə 23 ölkədən idmançılar çıxış edəcək.

“Trend” İnformasiya Agentliyi, 16 mart 2017-ci il