Azərbaycan gimnastları Macarıstan paytaxtında keçirilən "Gracia Cup" beynəlxalq turnirində iki qızıl, üç gümüş və iki bürünc medal qazanıblar.

Azərbaycan Gimnastika Federasiyasının mətbuat xidmətindən məlumat verilir ki, Marina Durunda daha çox mükafat qazanıb. Belə ki, onun aktivində iki qızıl medalı da var. Bu yaxınlarda keçirilən Dünya kubokunun bürünc mükafatçısı birinci yerə halqa və lentlə hərəkətlərə görə, ikinci yerə çoxnövçülük və topla hərəkətlərə, bürünc medala isə gürzlərlə hərəkətlərə görə layiq görülüb.

"Yarış ərəfəsində zədə alan Lalə Yusifovanın olmaması səbəbindən liderlik yükü Durundanın üzərinə düşüb və o, bütün finallarda iştirak edərək bizi pis vəziyyətdə qoymadı", - milli yığmanın baş məşqçisi Mariana Vasileva bildirib. Bundan əlavə, onun komanda rəfiqəsi Ayşə Mustafayeva üçüncü olduğu halqa ilə tapşırığa görə mükafatlandırma zamanı fəxri kürsüdə Marina ilə kampaniya təşkil edib.

Daha bir mükafat yerini ölkənin yunior komandasının gimnastları tutub. Gülsüm Şəfizadə, Nülufər Niftalıyeva, Səbinə Hümmətova, Aleksandra Platonova, Emiliya Bağıyeva və Aynur Mustafayevadan ibarət komanda finalda 5 halqa ilə oyunda yalnız Belarus komandasından geri qalaraq ikinci yeri tutublar.

Fərdi yuniorlara gəldikdə, Budapeştdə ən yaxşı nəticəni 13 yaşlı Jalə Piriyeva göstərib. O, 1998-2000-ci il təvəllüdlü yunior gimnastları qrupunda çıxış edərək halqa ilə hərəkətlərə görə 4-cü olub.

Yeri gəlmişkən, gənc azərbaycanlı gimnastların komandası olimpiya çempionu Alina Kabayevanın dəvəti ilə Nijnekamskda "Alina-2013" beynəlxalq festivalında iştirak ediblər. Ayşən Bayramova (1998-ci il təvəllüdlü), Səbinə və Samirə Əlizadə bacıları, Nərminə Hüseynova, Zeynəb Hümmətova, Fatimə Bayramova, Cənnət Məmmədova (hamısı 1999-cu il təvəllüdlü), Mədinə Əhmədova və Simarə Cəfərovadan (hər ikisi 2000-ci il) ibarət komanda yerli tamaşaçılara "Anastasiya" kompozisiyasını təqdim edib.

Bu arada Bakıda Türkiyənin gimnastika komandasının 10 günlük təlim-məşq toplantısı keçirilir. Keçmişdə yaxşı gimnast kimi tanınan Türkiyə nümayəndə heyətinin rəhbəri Berfin Serdil Sütçünün dediyi kimi, Bakı təlimlərinin əsas hədəfi bu il dəyişən qaydalar, eləcə də Vyanada keçiriləcək Avropa çempionatına hazırlıq nəzərə alınaraq köhnə tapşırıqlara təkrar baxış və yeni hərəkətlərin qurulmasıdır.