Bazar gününün axşamı, Monqolustanın paytaxtı Ulan-Batorda keçirilən 6-cı Asiya Gimnastradasında Azərbaycan idmançıları “Gimnastika hamı üçün” növü üzrə çıxış edərək öz bacarıqlarını nümayiş etdirdilər. Bütün iştirakçı komandalar qızıl medallara layiq görüldü. Azərbaycan kollektivinə isə əlavə olaraq “Tamaşaçı rəğbəti” nominasiyasında kubok təqdim olunub. Komandamızın parlaq çıxışı izləyiciləri heyrətləndirdi və onlarda böyük emosiyalar doğurdu. “Gimnastika hamı üçün” həmişə müxtəlif nəsilləri birləşdirən bir gimnastika növü olub. Biz buna 2024-cü ilin iyun ayında, bu növ üzrə yarışların Bakının dənizkənarı bulvarında keçirildiyi zaman şahid olduq. Məhz o tədbirdə çoxsaylı izləyicilər toplaşmışdı. Ümid edirik ki, Azərbaycan təmsilçiləri bu parlaq yolu davam etdirəcəklər. Onlar bu rəngarəng şounun çoxlu sayda pərəstişkarlarını da sevindirəcəklər.