10 və 11 oktyabr tarixlərində 2026-cı ilin “İdman paytaxtı” Qazax şəhəri ilk dəfə bədii gimnastika üzrə “Grace of Nature” turnirinə ev sahibliyi edib.

Qədim tarixi, zəngin mədəniyyəti və qonaqpərvər insanları ilə seçilən Qazax bu dəfə zərifliyin, gözəlliyin və idman əzminin bir araya gəldiyi gimnastika bayramına şahidlik edib. Şəhərin idman paytaxtı adını daşıdığı ildə belə bir yarışın Qazaxda təşkili idmanın bölgələrdə təbliği, gimnastikanın daha geniş auditoriyaya tanıdılması və yerli sakinlərin idman tədbirlərinə marağının artırılması baxımından xüsusi əhəmiyyət daşıyıb.

İki gün davam edən turnir ərzində müxtəlif yaş qruplarını təmsil edən gimnastlar çoxnövçülük və ayrı-ayrı alətlər üzrə proqramlarda çıxış edərək öz bacarıq və məharətlərini nümayiş etdiriblər. Zərif hərəkətlər, musiqi ilə vəhdət təşkil edən kompozisiyalar və gərgin idman mübarizəsi yarışa xüsusi rəng qatıb.

Turnir boyunca Qazax sakinlərinin bədii gimnastikaya göstərdiyi maraq və tamaşaçıların gimnastlara dəstəyi də diqqət çəkib. İdmançıların çıxışlarını maraqla izləyən tamaşaçılar yarışın ab-havasına xüsusi canlılıq bəxş ediblər. Bu maraq bir daha göstərib ki, gimnastikanın gözəlliyi və emosional gücü yalnız idman zalında deyil, insanların qəlbində də özünə yer tapa bilir.

Yarışın daha bir rəngarəng iştirakçısı isə “İdman paytaxtı” Qazaxın sevimli maskotu Aşıq Maqsud olub. Turnir boyunca Aşıq Maqsud həm tamaşaçılarla, həm də gimnastlarla bir araya gələrək tədbirə şənlik və xüsusi ab-hava qatıb. Onun iştirakı yarışın bayram ovqatını daha da gücləndirib, uşaqların və azarkeşlərin sevincinə sevinc əlavə edib.

Turnirin ikinci günündə də müxtəlif yaş kateqoriyaları üzrə yarışlar və mükafatlandırma mərasimləri keçirilib. Bədii gimnastika üzrə milli komandanın üzvləri də uğurlu nəticələrlə fərqləniblər.

2011-2012-ci il təvəllüdlü gimnastlar arasında Azadə Atakişiyeva çoxnövçülük üzrə qızıl, lentlə hərəkətlərdə gümüş, Gülnur Məmmədova isə çoxnövçülük üzrə bürünc medal qazanıb. Milli komandanın digər üzvü Nuray Muradlı gürzlərlə hərəkətlərdə qızıl, lentlə hərəkətlərdə gümüş medala layiq görülüb.

Beləliklə, “Grace of Nature” turniri Qazaxda idman mübarizəsi, xoş təəssüratlar və gimnastika sevgisi ilə yadda qalıb. 2026-cı ilin İdman Paytaxtı olan Qazax bu yarışla bir daha sübut edib ki, idmanın inkişafı yalnız qazanılan medallarla deyil, insanları bir araya gətirən, gənc nəslə ilham verən və şəhərin həyatına yeni rəng qatan belə tədbirlərlə də ölçülür.