Noyabrın 16-dan 19-dək Bolqarıstanın Sofiya şəhərində batut gimnastikası, tamblinq və ikili mini-batut üzrə 36-cı dünya çempionatı keçirilib. Yarışda ölkəmizi Azərbaycan yığma komandasının üzvü, batutçumuz Selcan Mahsudova və tambliqçimiz Mixail Malkin təmsil edib. Ötən il Bakıda keçirilən dünya çempionatının gümüş, bu il İtaliyanın Rimini şəhərində keçirilən Avropa çempionatının gümüş və bürünc medalçısı olan Mixail Malkin təəssüf ki, bu dəfə ən güclülərin yarışında təcrübəsindən maksimum yararlana bilməyib. O, dünya çempionatını 25.000 xalla 14-cü pillədə başa vurub. 
Böyüklər arasında dünya çempionatında debüt edən Selcan Mahsudova isə 50.290 xalla 18-ci pillədə qərarlaşıb. Xatırladaq ki, Selcan bu il paytaxtımızda keçirilən Dünya kubokunda gümüş medala sahib çıxmış, 2022-ci ildə iştirak etdiyi dörd Dünya kubokundan üçündə topladığı xalların cəminə əsasən Beynəlxalq Gimnastika Federasiyasının kubokuna layiq görülmüşdü.
Qeyd edək ki, qarşıda gənc idmançılarımızı 23-26 noyabr tarixlərində eyni şəhərdə adıçəkilən idman növləri üzrə keçiriləcək dünya yaş qrupları yarışları gözləyir. 
Bu yarışda ölkəmizi  batut gimnastikası və tamblinq üzrə ümumilikdə 17 idmançı təmsil edəcək.