16-19 oktyabr tarixlərində Bakıda, Milli Gimnastika Arenasında keçirilən TeamGym üzrə 15-ci Avropa Çempionatının açılış mərasimi böyük coşqu və təntənə ilə keçirildi. Bu möhtəşəm tədbir, həm yerli tamaşaçıları, həm də Avropanın müxtəlif ölkələrindən gəlmiş idmançıları və nümayəndələri bir araya gətirdi. Açılış mərasimi idman və mədəniyyətin bir araya gəldiyi möhtəşəm bir bayram kimi yadda qaldı.

Tədbirin əvvəlində musiqinin incəlikləri ilə bəzədilmiş çıxışlar, rəngarəng şoular və xüsusi rəqs nömrələri təqdim olundu. Arenada böyük maraqla izlənilən performanslar tamaşaçılara həm xoş anlar yaşatdı, həm də ölkəmizin gimnastikaya verdiyi əhəmiyyəti bir daha nümayiş etdirdi. Hər kəs Azərbaycanın idman arenasında bir lider ölkə olduğunu və yüksək səviyyəli təşkilatçılıq qabiliyyətini hiss etdi.

Açılış mərasimində çıxış edən gənclər və idman naziri, Avropa Gimnastikasının prezidenti Fərid Qayıbov ölkəmizin gimnastika sahəsindəki uğurlarından danışaraq bu nailiyyətlərin Azərbaycan Respublikasının Prezidenti İlham Əliyevin və Birinci vitse-prezident,  Azərbaycan Gimnastika Federasiyasının prezidenti Mehriban xanım Əliyevanın gimnastikaya göstərdiyi xüsusi qayğı və diqqət nəticəsində olduğunu bildirdi. Həmçinin ölkəmizin bu cür nüfuzlu yarışlara ev sahibliyi etməsinin əhəmiyyətini vurğuladı. TeamGym Avropa Çempionatının iştirakçılar üçün xüsusi önəm daşıdığını, burada nümayiş etdirilən güc, çeviklik və komanda işinin hər bir idmançının fərdi bacarıqlarını ən yüksək səviyyədə ortaya qoyduğunu qeyd etdi. Sonda idmançılara uğurlar arzuladı.

Yarışı açıq elan etmədən əvvəl bütün gimnastlar adından Dünya çempionu Tofiq Əliyev, hakimlər adından isə Böyük Britaniyanın I dərəcəli hakimi Liza Roz and içərək yarışın qaydalarına tam riayət edəcəklərinə və ədalətli davranacaqlarına söz veriblər.

Açılış mərasimindən sonra komandalar arenaya çıxaraq çempionata start verdilər. Yarışda 14 ölkənin 46 komandası qüvvəsini sınayır. Milli Gimnastika Arenasında Çexiya, Danimarka, Avstriya, Estoniya, Finlandiya, Böyük Britaniya, İslandiya, İtaliya, Lüksemburq, Niderland, Portuqaliya, Norveç, İsveç və təbii ki, yarışın ev sahibi Azərbaycan idmançıları çıxış edəcəklər. 28 hakim öz növünün əsl ustası olanların çıxışlarını qiymətləndirəcək.
Qeyd edək ki, yarışlar oktyabrın 19-dək davam edəcək.