Beynəlxalq Gimnastika Federasiyası (FIG) Portuqaliyanın Gimarayeş şəhərində akrobatika gimnastikası üzrə Dünya çempionatının başlaması ərəfəsində Azərbaycan təmsilçilərinin şanslarını dəyərləndirib. FIG xüsusilə Ağasif Rəhimov və Raziyə Seyidlidən ibarət qarışıq cütlüyü qeyd edib. Onlar bu növ üzrə Avropa çempionlarıdırlar və hazırda dünya arenasının zirvəsini fəth etməyi hədəfləyirlər. “Rəhimov & Seyidli” artıq Dünya birinciliyində fəxri kürsüyə yüksələ biliblər, lakin indiyədək qızıl medala sahib çıxmayıblar. Onlar qələbəyə hədəfləniblər”, - Beynəlxalq federasiya rəsmi saytında bu cür qeyd edir. Qeyd edək ki, Portuqaliyada keçiriləcək Dünya çempionatında ölkəmizi daha bir qarışıq cütlükl təmsil edəcək. Bu, Milana Əliyeva - Sabir Ağayev duetidir. Medallar uğrunda mübarizəyə həmçinin kişi cütlüyü Murad Rəfiyev və Daniel Abbasov, eləcə də Rəsul Seyidli, Riad Səfərov, Seymur Cəfərov və Abdulla Əl-Məşayxidən ibarət kişi qrupu qoşulacaq.