16 yanvar tarixində Milli Gimnastika Arenasında “Şelkunçik” adlı yeni il şousu baş tutdu. Uşaqların səbrsizliklə gözlədiyi bu şou onları macəralarla dolu fantastik nağıllar aləminə qərq etdi.   

Tədbir Azərbaycanı beynəlxalq müsabiqələrdə təmsil etmiş Sevda Mahmudova və Gülxanım Bayramovanın fortepianodakı ifaları ilə başladı.
Daha sonra Vətən uğurunda canından keçən şəhidlərin və Bakı-Qroznı reysini yerinə yetirən “Azərbaycan Hava Yolları” Qapalı Səhmdar Cəmiyyətinə məxsus “Embraer 190” tipli sərnişin təyyarəsinin qəzaya uğraması nəticəsində həlak olanların xatirəsi bir dəqiqəlik sükutla yad edildi.

Şouya ilk öncə gimnastika üzrə xüsusi olimpiyaçıların nümunəvi çıxışları ilə start verildi. Berlində keçirilən Ümumdünya Xüsusi Olimpiya Yay Oyunlarının “qızıl” və “bürünc” mükafatçısı Mehriban Tağıyeva (bədii gimnast), o cümlədən xüsusi olimpiyaçı Fərid Ociyev maraqlı çıxış proqramı nümayiş etdirdi.
 
Şouda müxtəlif gimnastika növlərinin elementləri musiqinin sehirli sədaları ilə birləşərək əsl bayram atmosferi yaratdı. Xoreoqrafiyanın və bədii tərtibatın ustalıqla hazırlandığı bu proqram, həm böyükləri, həm də uşaqları öz rəngarəngliyi və dinamikası ilə valeh etdi.
Şounun sujet xətti AGF-nin xoreoqrafları Kamil Quliyev və Akif Kərimlinin rəhbərliyi ilə qurulmuşdu. 

Gənc qız Klara atasının ona verdiyi, lakin açarı olmayan sirli qutu ilə qəribə bir dünyaya – Dörd diyara düşür. Klara burada anasının keçmişdə bu diyarlara hakim olduğunu və onları idarə etdiyini öyrənir. Ancaq indi bu dünya xaos içindədir. Dörd diyarın liderlərindən biri olan Şəkər Gavalı Pərisi və digər simalar arasında güc mübarizəsi baş verir. Klara “Şelkunçik” ilə birləşərək itkin açarın arxasınca getdi və tamaşaçılar da onlarla birlikdə bu sehirli dünyaya səyahət etdi.
Klara və Şelkunçiklə birlikdə macəralar diyarına səyahət edən uşaqlar, həm şou boyunca müxtəlif sürprizlərlə qarşılaşdı, həm də onlar üçün xüsusi olaraq hazırlanmış proqramlar və interaktiv oyunlarla əyləncəli vaxt keçirdilər.
Şou tamaşaçılar üçün hazırlanmış şar yağışı ilə başa çatdı.