Bu həftəsonu Latviya və İspaniyada bədii gimnastika üzrə beynəlxalq turnirlər yekunlaşıb.

Riqada ənənəvi olaraq hər il keçirilən “Baltic hoop” yarışı, Gülsüm Şəfizadənin çoxnövçülükdə əldə etdiyi bürünc medalla yadda qaldı. Birinciliyi Belarusdan olan gimnast Melitina Stanuta, “gümüş” medalı isə Rusiyadan olan gimnast İrina Annenkova əldə etdi.

Digər gimnastımız Zeynep Çelep çoxnövçülükdə və halqa ilə 8-ci yerdə qərarlaşdı. Yeniyetmələrdən ibarət qrup komandası 5 topla çıxışlarına görə 4-cü oldu.

Eyni zamanda cənubda, İspaniyanın Barselona şəhərində Azərbaycan gimnastı Marina Durunda beynəlxalq turnirdə iştirak edirdi və o, gürzlərlə çıxışlarına görə 3-cü yerdə qərarlaşıb.