Azərbaycanın akrobatika gimnastikasının təmsilçiləri sentyabrın 19-dan 22-dək Portuqaliyanın Gimarayeş şəhərində keçirilən Dünya çempionatında uğurlu çıxışlarına görə tarix yazdılar. Yarışın ilk günündə Azərbaycan gimnastları tarixdə ilk dəfə olaraq komanda hesabında ikinci yerə layiq görüldülər. Birinci yerdə Çin, üçüncü yerdə isə İsrail təmsilçiləri qərarlaşıblar. Kişi cütlüyü - Murad Rəfiyev & Daniel Abbasov, qarışıq cütlük - Ağasif Rəhimov & Raziyə Seyidli, eləcə də kişi qrupu - Seymur Cəfərov, Rəsul Seyidli, Riad Səfərov və Abdulla Əl-Məşayxi uğurlu performans nümayiş etdirərək, gümüş medala sahib çıxıblar. Dünya çempionatının ikinci günü də uğurlu və eyni zamanda tarixi oldu. İdmançılarımız bir anda üç qızıl medal əldə etdi. Murad Rəfiyev & Daniel Abbasovdan ibarət kişi cütlüyü iki dəfə fərqləndi. Onlar qarışıq hərəkətlər proqramında 28.500 xal toplayaraq qalib oldu. Eyni nəticəyə balans hərəkətlərində də nail oldular. Onlar hakimlərdən 28.540 xal topladı. Daha bir qızıl balans hərəkətlərində əldə olundu. Onun sahibləri Ağasif Rəhimov və Raziyə Seyidlidən ibarət qarışıq cütlük oldu. Onlar 28.730 xal toplayaraq fəxri kürsünün ən yüksək pilləsinə yüksəldilər. Seymur Cəfərov, Rəsul Seyidli, Riad Səfərov və Abdulla Əl-Məşayxidən ibarət kişi qrupu da balans hərəkətlərində medallara yaxın oldu. Onlar finalda 27.650 xal toplayaraq beşinci yerdə qərarlaşdı. Bu gün də davam edəcək bu tarixi uğur münasibətilə idmançılarımızı təbrik edirik, çünki Azərbaycan daha beş final proqramında təmsil olunacaq.