Bu gün Macarıstanın paytaxtı Budapeştdə keçirilən idman gimnastikası üzrə gənclər arasında beynəlxalq turnirə komandamız 8 medalla yekun vurub.

Nə xoş təsadüf ki, məhz Respublika günü ərəfəsində millimizin perspektivli və gənc gimnastları düz iki dəfə himnimizi Budapeştin gimnastika arenasında səsləndirməyi bacarıblar.

Komandamızın hesabına ən çox medal yazdıranlardan biri Səməd Məmmədli olub. Təmsilçimiz dəstəli at üzərində çıxışlarına görə qızıl, dayaqlı tullanmada gümüş, parallel qollarda isə bürünc medala sahiblənib. Daha bir bürünc medalı isə gimnastımız çoxnövçülükdə qazanıb.

Növbəti qızıl medalı isə hesaba Cavidan Babayev halqalarda uğurlu çıxışı ilə yazdırıb.

Digər idmançımız Ramin Dəmirov da  komanda yoldaşlarından geri qalmayaraq, öz yaş kateqoriyasında çıxışlarına görə halqalarda gümüş, çoxnövçülükdə isə bürünc medalla mükafatlandırılıb.

Ağamurad Qəhrəmanovun turnikdəki çıxışı isə onu fəxri kürsünün ikinci pilləsinə yüksəldib.