2025-ci ildə aerobika gimnastikası üzrə Avropa yaş qrupları yarışları və Avropa çempionatı ilk dəfə olaraq Gəncə şəhərində keçiriləcək! Bəli, doğru oxudunuz – Avropa qitəsinin ən prestijli aerobika yarışları Azərbaycanın bu gözəl şəhərində baş tutacaq! Avropa Gimnastikasının İcra Komitəsinin 6 sentyabr tarixindəki qərarı Gəncəni beynəlxalq idman arenasında yeni bir parlayan ulduz olaraq təqdim edir. Bu, gimnastika idman növü üzrə bölgələrimizdə keçiriləcək ilk Avropa çempionatı olacaq. Beləliklə, Gəncə gələn il Avropanın ən çevik və enerjili idmançılarını qonaq edəcək. 
Amma bu, hələ hamısı deyil! Gəncə idman həvəskarları üçün bu böyük tədbirə ev sahibliyi etməklə yanaşı, həm də özünün möhtəşəm tarixi və mədəniyyəti ilə tanınacaq. Şəhərin əsrarəngiz memarlığı, qədim küçələri və qonaqpərvər insanları bu yarışları daha da xüsusi edəcək. 
Yarışların keçiriləcəyi Gəncə İdman Sarayı bu il istifadəyə verilib. Azərbaycan Respublikasının Prezidenti İlham Əliyev  cari ilin aprel ayında sarayın açılışında iştirak edib. Gəncə İdman Sarayı müasirliyi ilə diqqəti cəlb edir. İdman Sarayında bütün lazımi infrastruktur yaradılıb. Bu isə öz növbəsində bir çox idman növləri üzrə oyunların beynəlxalq standartlara uyğun şəkildə keçirilməsinə şərait yaradır. 
Burada həm idman, həm də mədəniyyət sahəsində unudulmaz anlar yaşanacaq. Gəncə beynəlxalq idman cəmiyyətinin yeni diqqət mərkəzi olacaq və siz isə bu tarixi anların bir hissəsinə çevriləcəksiniz!
Bu tədbir düşünüləndən daha çoxunu vəd edir – o, bölgənin gənc idmançılarına özlərinə inamlarını artırmaq və idman dünyasında öz yerlərini tapmaq üçün bir şans təqdim edir. Avropanın ən yaxşı aerobika ustalarını yaxından izləmək gənc istedadların bu idman növünə həvəslərini aşkar etmələrinə səbəb olacaq. Dünya gimnastika ulduzları ilə təmasda olmaq gənclərimizə uğurlu idmançı olmaq arzusunun illuziya olmadığını göstərəcək.
Xatırladaq ki, paytaxtımız Bakı şəhəri 2019-cu ildə aerobika gimnastikası üzrə Avropa çempionatı, 2021-ci ildə isə aerobika gimnastikası üzrə dünya yaş qrupları yarışları və dünya çempionatına ev sahibliyi edib.
Bu dəfə isə Gəncəyə yönələn qitənin idman dalğası ilə aerobika gimnastikası üzrə Avropa yaş qrupları yarışları və gənclər arasında Avropa çempionatı 9-11, böyüklər arasında Avropa çempionatı isə 14-16 noyabr tarixlərində baş tutacaq.
 Bütün idman həvəskarlarını tədbirə qatılmağa, idmanda ilklərin nəbzini tutmağa, idman və mədəniyyətin vəhdətindən ovsunlanmağa çağırırıq!