2-3 dekabr tarixlərində Bakı Beynəlxalq Gimnastika Federasiyasının (FIG) Konqresinə ilk dəfə ev sahibliyi edəcək.  

Beynəlxalq Gimnastika Federasiyasının (FIG) nizamnaməsinə əsasən, ən yüksək ali orqan sayılan konqresdə 115-dən çox ölkədən ümumilikdə 300-ə yaxın iştirakçının qatılacağı gözlənilir. Konqresdə FIG-nin prezidenti və texniki əlaqələndiricisinin, həmçinin ali qurumun hər bir gimnastika növü üzrə Texniki Komitələrinin prezidentlərinin hesabatları dinləniləcək. Daha sonra FIG-yə daxil olan qitə ittifaqlarının rəhbərləri hesabatla çıxış edəcək, habelə qurumun rüblük maliyyə planı təsdiqlənəcək. Bunlarla yanaşı, FIG-yə yeni üzvlərin qəbulu, həmçinin hər hansı bir federasiyanın qurumdan xaric edilməsi məsələsi müzakirə ediləcək və növbəti Konqresin keçirilmə yeri müəyyən olunacaq.

FIG-nin rəhbər orqanlarının, o cümlədən bu quruma üzv olan federasiyaların Konqresdən əvvəl irəli sürdükləri müxtəlif təkliflər bu iclasın gedişatında müzakirə olunacaq. Həmçinin beynəlxalq qurumun qaydalarına, Nizamnaməsinə edilə biləcək dəyişikliklərə və müxtəlif mükafatların verilməsinin təsdiqinə baxılacaq. 

Qeyd edək ki, Konqresdən əvvəl bir qayda olaraq noyabrın 29-da FIG-nin Prezident Komissiyasının iclası, noyabrın 30-dan dekabrın 1-dək isə ali gimnastika qurumunun icra komitəsinin iclasları paytaxtımızda keçiriləcək və daha sonra Konqresə start veriləcək.

Xatırladaq ki, 2017-ci ilin mayında FIG-nin rəhbər orqanlarından olan FIG Şurasının iclası da məhz paytaxtımızda təşkil olunub.

Proqram

İştirakçılar